ميدان وردګو کې د مرمۍ لګیدو ۱۴ کسان وژلي دي
ښاغلی سلطاني وايي پېښه د سيد اباد ولسوالۍ د اوتر کلي په يوه جومات کې شوې ده
د پلازمېنې کابل په سویل کې د ميدان وردګ ولایت چارواکو تاييد کړې چې په دغه ولایت کې د مرمۍ لګېدو له امله لږترلږه ۱۰ کسان وژل شوي دي.
چارواکي وايي د وژل شويو او ټپي شويو کسانو هويت لا نه دی معلوم.
د دغه ولايت مرستيال والي ذاکر حسين سلطاني ويلي دا چې پېښه نن (جمعه، ډسمبر ۴مه) سهار وختي شوې په اړه يې ډېر جزييات نه دي ډاګيزه شوي.
ښاغلی سلطاني وايي پېښه د سيد اباد ولسوالۍ د اوتر کلي په يوه جومات کې شوې ده.
چارواکي وايي وژل شوي کسان ټول ولسي وګړي دي.
دی وايي د پېښې د ارزونې لپاره يې يو پلاوی چمتو کړی، خو دغه پلاوی بايد د سيمې د خلکو په همغږۍ او همکارۍ سيمې ته ورشي.
د ميدان وردګ مرستيال والي وايي تېره شپه هم په دغه سيمه کې جګړه شوې وه.
تر اوسه کومې وسلوالې ډلې د دغه بريد پړه پر غاړه نه ده اخيستې او نه هم د بريد انګېزه معلومه ده.
Author
About Author
