ايتلافي ځواکونو سوريه کې هوايي بريدونه ترسره کړي
ايتلافي ځواکونو سوريه کې هوايي بريدونه ترسره کړي
ويل کېږي په دغو بريدونو کې لږ تر لږه ۲۳ جنګيالي وژل شوي او ګڼ نور ټپيان دی
د امريکا په مشرۍ ايتلافي ځواکونو د اسلامي دولت ډلې پر وړاندې د سوريې په رقه ښار کې هوايي بريدونه ترسره کړي دي.
دغه ښار د دې ډلې جنګياليو ته د خلافت د پلازمېنې حيثيت لري، چې په ۲۰۱۴ کال کې په عراق او سوريه کې منځ ته راغلې.
د امريکا پوځ وايي په رقه ښار کې يې ۱۶ هوايي بريدونه ترسره کړي او دا تر اوسه په سوريه کې تر ټولو لوی بريدونه بولي.
د سوريې د بشري حقونو د څار ډله وايي د اسلامي دولت ډلې لږ تر لږه ۲۳ جنګيالي وژل شوي. دا ټولنه زياتوي په دې بريد کې شپږ ولسي وګړي هم وژل شوي دي.
دغه بريدونه د اسلامي دولت ډلې له خوا د په پلميرا (تدمر) کې د ۲۵ کسانو له وژلو وروسته ترسره کېږي.
په يوه ويډيو کې چې د اسلامي دولت ډلې له خوا خپره شوې وه ۲۵ کسان ښوول شوي چې د سوريې په لرغوني ښار پلميرا (تدمر) کې وژل کېږي.
دغه ويډيو د ټولنيزو رسنيو په مټ خپره شوې چې د اسلامی دولت ډلې سره تړاو لري، تراوسه دا نه ده روښاه چې دا ويډيو کله جوړه شوې ده.
بل خوا د سوريې امنيتي ځواکونه وايي سرتېري يې د زبداني ښار ته ننوتلي دي. دغه ښار د سني ياغي ډلې تر کنټرول لاندې دی.
بشار الاسد ته وفادار د سوريې پوځ چې د لبنان د حزب الله شيعه ډلې مرسته ورسره ده د دې ښار د ولکې لپاره جنګېږي.