په هند كې د ۸ پښو او لاسونو لرونكى ماشوم زېږېدلى دى
په هند كې د ۸ پښو او لاسونو لرونكى ماشوم زېږېدلى دى.
د هندوستان په ختيځ كې د جاركند په ښار كې يو ماشوم چې څلور پښې او څلور لاسونه لري زېږېدلى دى.
هندوان پدې باور دي چې زېږېدلى ماشوم د دوى د يو خداى استازى دى چې هغه هم ۸ پښې او لاسونه لري.
په زرګونو هندوان ددې خبر په اورېدلو سره د ماشوم د زېږېدو ځاى ته تللي دي او نور هم ور روان دي.
هندوان باور لري چې زېږېدلى ماشوم په اصل كې د ګانیشا په نامه د يو خداى روح دى چې د انسان په جسم كې نړۍ ته راغلى دى. ګانیشا چې سمبول يې د څلورو لاسونو لرونكى يو فيل دى په هندو كلتور كې تر ټولو زيات عبادت يې كيږي.
داكټران وايي چې دا په اصل كې دوه ماشومان دي چې د مور په ګیډه كې د نه لويدو په پايله كې د دواړو ماشومانو تنونه يو بل سره نښتي دي.
ويل كيږي چې د زېږېدلي ماشوم روغتيايي حالت د ډاډ وړ دى. تر اوسه پورې د ماشوم د مور روغتيايي حالت چې اورېدا خاتون نوميږي ترينګلى دى.
Author
About Author
