د خواف ـ هرات ریل پټلۍ څلورمې برخې د لومړي فاز جوړولو تړون لاسلیک شو

د خواف ـ هرات ریل پټلۍ څلورمې برخې د لومړي فاز جوړولو قرارداد د یوه قزاقستاني شرکت سره لاسلیک شو.

د خاورمیانه خبرې اژانس د راپور له مخې، د ریل پټلۍ دا قرارداد نن سهار( لیندۍ ۲۱) د افغانستان د ریل پټلۍ د مسوولینو او د «INKOM KZ»شرکت ترمنځ په ارګ کې لاسلیک شوی دی.

د ارګ په خبرپاڼه کې راغلې، د خواف ـ هرات ریل پټلۍ د څلورمې برخې لومړی فاز ۴۳ کیلومټره اوږدوالی لري او د هرات غوریان، زنده جان او انجیل ولسوالیو څخه تېرېږي.»

د خبرپاڼې له مخې  دغه پروژه چې په ۱۶ میاشتو کې به پای ته ورسېږي، له ۵۸.۵ میلیون ډالرو څخه زیات لګښت پرې راځي او د افغانستان حکومت له لورې تمویلېږي.

د مالوماتو پر بنیاد د خواف ـ هرات ریل پټلۍ د ۲۲۵ کیلومټرو په مجموعي اوږدوالي په ۴ برخو کې د ایران او افغانستان ترمنځ جوړېږي.

د دې پروژې دوه لومړنۍ برخې، د ۷۶ کیلومټرو په اوږدوالي د ایران له خواف تر شمتیغ سرحد پورې وړاندې جوړه شوې او ګټې اخیستنې ته اماده شوې او د دریمې برخې کار د افغانستان په خاوره کې د ۶۲ کیلومټرو په اوږدوالي له شمتیغ سرحد څخه تر غوریان ولسوالۍ پورې ۹۵ سلنه بشپړ شوی دی.

 

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *