په افغانستان کې دوه امریکایي سرتیري ووژل شول -

کابل ته د امریکا د بهرنیو چارو د وزیر د سفر هم مهاله په افغانستان کې ددغه هېواد دوه سرتیري ووژل شول.

د خاور میانه خبرې اژانس د راپور له مخې،د قاطع ملاتړ ماموریت ددې دوه سرتیرو وژل کېدل تایید کړي دي.

ددې ماموریت د نن ورځې ( سرطان ۵) به خبرپاڼه کې چې د رسنیو په اختیار کې یې ورکړي،ددې سرتیرو د څرنګوالی او د وژل کېدو د ځای په اړه څه نه دي ویل شوي؛ مګر راغلي چې جزئیات به یې وروسته وړاندي شي.

د خبرپاڼې په نقل:« د امریکا د متحده ایالتونو د دفاع وزارت د سیاست پر اساس ددې هېواد د وژل شویو سرتیرو نوم له لومړي اطلاع وروسته ۲۴ ساعته خپریږي.»

دا دوه سرتیري په داسې حال کې وژل کیږي چې ددې هم مهاله ددغه ورځې په مازیګر د امریکا د بهرنیو چارو وزیر مایک پمپئو کابل ته راغلی او د ملې وحدت د حکومت د مشرانو سره په نږدې راتلونکي کې د طالبانو سره د سولې په اړه خبرې وکړي.

د طالبانو ویاند،ذبیح الله مجاهد پر خپل ټویټر ادعا کړي چې دغه ځواکونه د میدان وردګو ولایت په سیداباد ولسوالۍ کې ددې ډلې د جنګیالیو په یوه کمین کې وژل شوي دي.

په دې ترتیب سره،د ۲۰۱۹ میلادي کال په لمړنیو اووه میاشتو کې په افغانستان کې د وژل شویو امریکایي سرتیرو شمېر لس تنو ته ورسید.

د یادونې وړ ده چې د ۲۰۰۱ کال څخه تر اوسه پورې په افغانستان کې نږدې ۲۵۰۰ سرتیري د جګړې په جریان کې وژل شوي او شاوخوا ۲۱ زره سرتیري نور ټپیان شوي دي.