د ټاکنو د کمیسیون د پخواني رئیس په غیاب کې حکم؛یو کال بند -

د درنو جرمونو سره د مبارزې د محکمې له لوري د ټاکنو د خپلواک کمیسیون پخوانی رئیس له یوه کال څخه په زیات بند او یو میلیون افغانۍ په جریمې محکوم شوی دی.

د خاور میانه خبرې اژانس د راپور له مخې،احمد یوسف نورستانی چې د هرات پخوانی والي هم وو،نن د ( غویي ۱۵) د درنو جرمونو سره د مبارزې د محکمې له لوري په غیابي ډول محاکمه شو.

محکمه دعوه کوي چې نوموړی هغه مهال چې په ۲۰۰۹ کال کې د هرات والي وو د ملې بس تصدۍ له بودیجې څخه یومیلیون افغانۍ ویستلي او بیرته یې د دولت خزانې ته جمع کړي نه دي.

د محکمې قاضي وویل چې دا قاطع حکم نه دی او ښاغلی نورستانی کولای شي چې د استیناف غوښتنه وکړي.

له بله پلوه د ټاکنو د خپلواک کمیسیون پخواني رئیس د خپل ځان په دفاع کې ویلي دي چې دغه پیسې د سید حسین انوري د واک پر وخت اخیستل شوی دی.

په همدې اساس ،د محکمې له لوري نورستانی په ۱۳ میاشتې بند او یومیلیون افغانې جریمې په ورکړې محکوم شوی دی.