پر افغان ولسي وګړو بریدونه جنګي جنایتونه دي

په افغانستان کې د ملګرو ملتونو د سیاسي استازولۍ (یونما) د بشري حقونو مشرې ویلي، د ولسي وګړو پر استوګنځایونو او ملکي خلکو د طالبانو بریدونه ”جنګي جنایت” ګڼل کېږي.

د یونما د بشري حقونو د برخې مشرې جورجت ګانون ویلي ”هغه نړیوال بشردوستانه قوانین چې ددغه هېواد ټول اړخونه‎ یې په مراعاتولو ملکف دي، پر ملکي وګړو او ناپوځي ځایونو بریدونه جنګي جنایت بولي”.

آغلې ګاګنون دا هم ویلي چې ”وینو چې اورپکې ډلې په منظم ډول د ولسي خلکو پر استوګنځایونو بریدونه کوي. خو هغه څه چې لا ډېر ناوړه شوي دا دي چې د ولسي خلکو د استوګنې پر ځایونو د بریدونو نېغه پړه مني”.

طالبانو وړاندې پخپلو ویناپاڼو کې د هغو بریدونو پړې منلې دي، چې تر ډېره پکې ولسي وګړي وژل شوي، خو دوی ادعاوې کوي، چې هدف یې ولسي وګړي نه، بلکې بهرنیان دي.

خو آغلې ګاګنون وايي، د اورپکو ډلو له خوا د ولسي وګړو تعریف قانوني بڼه نه لري، چې په وینا یې د ”دوی [اورپکو] تعریف نه په ملي او نه هم نړیواله کچه منل شوی دی. دوی خپل ځانګړی تعریف لري. هرڅه چې کوي، د جواز لپاره یې یو دلیل وايي”.

د ملګرو ملتونو د رپوټونو له مخې، د افغانستان په جګړه کې پر ولسي وګړو بریدونه یوازې پر وسله والو طالبانو پورې نه دي تړلي، بلکې د افغانستان دولتي ځواکونه او نړیوال ځواکونه هم د ولسي وګړو په وژلو کې ښکېل ګڼل کېږي.

له آغلې ګاګنون وپوښتل شول، چې آیا په دې اړه یې څه نظر دی؟

هغې په ځواب کې وویل: ”موږ افغان ځواکونه نه دي لیدلي، چې په لوی لاس پر ولسي وګړو بریدونه وکړي. دا نور کسان دي چې دا کارونه کوي. موږ له افغان ځواکونو غوښتي چې د ولسي وګړو د ساتنې لپاره تر خپله وسه له احتیاطه کار واخلي”.