بغداد ته د رمادي کډوالو پرمخ لار وتړل شوه

پر رمادي د ”اسلامي دولت” تر ولکې وروسته له دې ښاره تر ۴۰ زرو ډېر وګړي وتلي دي.

عراقي حکومت له رمادي ښار نه پلازمېنې بغداد ته د تلونکو کډوالو پر مخ د فرات سیند پر سر د “بزیبیز” په نوم مهم پل تړلی دی.

وېره دا ده چې ددغه پله له لارې د “اسلامي دولت” ډلې جنګیالي پلازمېنې ته لاره ونه مومي.

څو ورځې وړاندې، د “اسلامي دولت” جنګیالیو له خوا د رمادي ښار تر نیول کېدو وروسته، د رمادي له جګړو تر ۴۰ زرو ډېر وګړي بې ځایه شوي دي.

دغه پل له انبار ولایت ته بغداد ته یوازېنۍ خوندي لار ګڼل کېږي.

د خوړو نړیوال سازمان ویلي، الانبار سني مېشت ولایت ته به د خوړو مرستې واستوي.

دغه سازمان دا هم وايي، هلته ۲۵ زره وګړي بېړیو مرسته ته اړ دي.

رپوټونه وايي، “اسلامي دولت” د رمادي ختيځ او د فرات درې سوېلي سیمو د نیولو هڅه کوي، خو حکومت پلوي ځواکونه پر رمادي د برید لپاره چمتووالی نیسي.

د تېرې جمعې په ورځ، د عراق مرستیال لومړي وزیر صالح المطلق وویل، له “اسلامي دولت” سره جګړه “سیمه ییزه بڼه” نه لري، بلکې نوموړي پر نړیوالې ټولنې د عملي ګامونو اخیستو غوښتنه وکړه.

پر همدې مهال، داعش له سوریې سره د عراق پر پوله وروستۍ اډه نیولې ده.

د التنف په نامه دغه اډه د تېرې پنجشنبې په ورځ وروسته تر هغه د داعش لاسونو ته ولوېده، چې د سوریې تاریخي تدمر ښار یې ونیو.