په فراه ولايت کي 5 تنه افغان کماندو د امريکايي ځواکونو په هوايي بريد کي وژل شوي -

په فراه ولايت کي ۵ تنه افغان کماندو د امريکايي ځواکونو په هوايي بريد کي وژل شوي او د چتک غبرګون د قطعی یوه سرتیري په ګډون شپږ نور ټپیان دی د فراه ولايت بالا بلوک ولسوال سيد محمد ويلي پيښه تيره ورځ ناوخته د کنسک په سيمه کي رامنځ ته شوې ده

د بالا بلوک ولسوال سید محمد ویلي: په دې سیمه کې د عملیاتو پر مهال امریکایي ځواکونو، د ملي اردو پر کماندو برید کړی چې له امله یې د کماندو پنځه سرتیري وژل شوي او د چتک غبرګون د قطعې یوه سرتیري په ګډون شپږ نور ټپیان دي. د دې سیمې یو شمیر اوسیدونکو هم ویلي، په دې برید کې د ملي اردو اوه سرتیري وژل شوي دي، د سیمه ایزو خلکو په وینا په دې سیمه کې د بریدونو پر مهال د دولت دیری وسله وال مخالفین هم له منځه تللي.

د فراه والي ویاند محمد ناصر مهدوي دا برید رد کړی خو ویلي یې دي چې په دې سیمه کې عملیات دوام لري. دا پّ داسې حال کې ده چې تیره اونی هم په ننګرهار ولایت کې د امریکایي ځواکونو په هوایي برید کې اولس ملکي کسان وژل شوي او یو شمیر هم ټپیان وو.

امریکایي ځواکونو ویلي د ننګرهار د برید په هکله یې پلټڼې پیل کړې دي او په کابل کې د ملګرو ملتونو دا برید غندلی ویلي یې دي، چې د ننګرهار په برید کې ټول وژل شوي کسان ملکي وګړي وو.

له کله چې په هیواد کې د امریکایي ځواکونو بریدونه ډیر شوي ور سره د ملکي کسانو د تلفاتو کچه هم لوړه شوې ده. دا هغه تیروتنې دي چې د سلګونه ملکي کسانو ژوندیې اخستی دی او له دې بریدونو څخه افغان ځواکونه هم بې پرخې ندي پاتې.