د ننګرهار په كوټ كې تصفيوي عمليات، ۹ داعشيان مړه، ۷ ټپيان

د ننګرهار په كوټ كې تصفيوي عمليات، ۹ داعشيان مړه، ۷ ټپيان د ننګرهار ولايت د کوټ ولسوالۍ په خورګۍ او وچ کوټ سيمو کې د ګډو کورنيو ځواکونو له لوري تصفيوي عمليات پيل شوي، چې په ترڅ کې يې نهه داعش وسله وال وژل شوي او اووه نور ټپيان شوي دي .

د ننګرهار د ملي امنيت رئيس بريد جنرال داد محمد حريفي وايي، چې د دغو عملياتو هدف سيمه د وسله والو مخالفينو له شتون څخه پاکول دي .

د ننګرهار ولايت مقام مطبوعاتي دفتر څخه په خپره شوې خبرپاڼه كې د ملي امنيت د رئيس له قوله راغلي، هغه سيمې چې له وسله والو مخالفينو څخه پاکې شي، په کې به د ملي امنيت رياست په مالي او تخنيکي ملاتړ شاوخوا درې سوه تنه پاڅون کوونکي ځاى پر ځاى شي .

د کوټ ولسوالۍ يو شمېر قومي مشرانو له پيل شوو عملياتو د ملاتړ ترڅنګ ژمنه وکړه، چې د خپلې سيمې د امنيت ټينګښت لپاره هر ډول قربانۍ ورکولو ته چمتو دي.

داعش وسله والو تراوسه په دې اړه څه نه دي ويلي