د بې پيلوټه الوتكې په بريدونو كې ۱۳ وسله وال طالبان وژل شوي

د ختیځ په دوو ولایتونو ننګرهار او کونړ کې د بهرنیو ځواکونو بې پیلوټه الوتکې بریدونو کې د بهرنیانیو په ګډون ۱۳ وسله وال طالبان وژل شوي دي.

چارواکي وايي، چې یاد بریدونه پرون ناوخته شوي دي.

په ختیځ کې د ۲۰۱ سیلاب قول اردو د عامه اړیکو مسول ډګروال محمد نعمان هاتفي کلید ته وویل، چې بهرنیو ځواکونو د ننګرهار د غني خیلو ولسوالۍ په اوه ويشتمې ویالې سیمه کې دغه برید کړی.

هغه زیاته کړه، یاد برید کې د بهرنیانو په ګډون ۱۲ وسله وال طالبان وژل شوي، چې د درېیو تنو جسدونه یې پېژندل شوي هم دي.

د یو بل خبر مخې د کونړ د پیچ درې ولسوالۍ اړوند په شوړیک درې سیمه کې هم بهرنیو ځواکونو د بې پيلوټه الوتكې بریدونه کړي.

د ۲۰۱ سیلاب قول اردو د عامه اړیکو د مسؤل د معلوماتو له مخې په یاد برید کې د حاجي ظریف په نوم د وسله والو طالبانو یو قوماندان وژل شوی دی.

وسله والو طالبانو تراوسه په دې اړه څه نه دي ويلي.