کمیته امنیت ملی کشور تاجیکستان اعلام کرده است که قاچاقبران مواد مخدر افغانستان بر قوای سرحدی این کشور شلیک کرده و پس از آن به طرف منطقه همجوار پنج فرار کردند.
به گزارش خبرگزاری خاورمیانه، در برخورد اولی یک قاچاقبر با ۱۵ کیلوگرام چرس دستگیر شد و در حادثه دیگر دو قاچاقبر افغان توسط محافظین سرحدی تاجیکستان در منطقه همدانی متوقف شده و در شلیک متقابل این دو نفر زخمی گردیده و ۴۰ کیلوگرام مواد مخدر بدست قوای امنیتی تاجیکستان افتاده است.
نظر به گزارش منابع تاجیکی، از آغاز سال جاری تا کنون مقامات امنیتی تاجکستان بیش از ۴ تن مواد مخدر را در سرحدات این کشور با افغانستان بدست آورده اند.
تاجیکستان ۱۳۴۴ کیلومتر سرحد مشترک با افغانستان دارد و یکی از اولین کشور های است که در راه قاچاق مواد مخدر افغانستان به روسیه و اروپای غربی، قرار گرفته است.
Author
