د سمنګانو په ترافيکي پېښه کې ٣٢ تنو ته مرګ ژوبله اوښتې
![](https://middleeastpress.com/pashto/wp-content/uploads/sites/4/2015/12/C5A688F1-5AF3-49FF-B39E-0880D59BAF3A_w640_r1_cx0_cy10_cw0_s1.jpg)
بلخ پر لويه لاره کې د سمنګانو ولايت په حضرت سلطان ولسوالۍ کې د دوو موټر د ټکر له امله ١٧ تنه مړه شوي او ١٥ نور ټپيان دي.
د حضرت سلطان ولسوال سراج الدين فطرت وويل چې نن ماښام څه باندې پنځه بجې ٤٠٤ډوله مسافر وړونکي موټر چې له بلخ څخه د کابل په لور وان و، له يوه بل باروړونکي موټر سره د دې ولسوالۍ په مرکز کې ټکر کړى دى.
ده زياته کړه، د دې پېښې له امله مسافر وړونکى موټر له خپل مسيره اوښتى او له پله څخه ١٥ متره لاندې سيند ته لوېدلى دى.
د سمنګانو د عامې روغتيا رييس ډاکټر عبدالحميد، وويل چې د دې ترافيکي پېښې له امله ولايتي روغتون ته ١٧ جسدونه ور وړل شوي، چې ١٢ نارينه، درې ښځې او دوه ماشومان په کې شامل دي.
د هغه په وينا، دغه راز ١٥ ټپيان هم روغتون ته انتقال شوي، چې د څلورو تنو روغتيايي حالت نازک وو او د بلخ ولايتي روغتون ته لېږدول شوي دي.