د لغمان ولایت د الیشنګ ولسوالۍ ودانۍ ته نږدې د موټر بم برید په پایله کې دوه تنه سرتیري او یو ملکي وګړی وژل شوي او د ملکي وګړو په ګډون ۳۰ تنه نور ټپیان شوي دي.
د خاور میانه خبرې اژانس د راپور له مخې،دغه پیښه نن ( تلې ۲۴) د سهار په ۶:۰۰ د الیشنګ ولسوالۍ ودانۍ ته نږدې رامنځته شوي ده.
د کورنیو چارو د وزارت ویاند نصرت رحیمي وایي چې په دې چاودنه کې د دوه پولیس سرتیرو په ګډون درې تنو خپل ژوند له لاسه ورکړی او د ۶ تنو امنیتي سرتیرو په ګډون ۳۰ تنه ټپیان شوي دي.
په ورته وخت کې د لغمان د والي ویاند،اسدالله دولتزي خاور میانه ته وویل چې بمونه په یوه «مازدا» موټر کې ځای پر ځای شوي و چې د ولسوالۍ ودانۍ ته نږدې یې چاودنه ورکړل شوي ده.
نوموړي څرګنده کړه چې ددې پیښې ټپي شوي ټول ملکي وګړې ماشومان په ځانګړې ډول د ښوونځي زده کوونکې دي چې روغتون ته لیږدول شوي دي.
وسله والو طالبانو ددې چاودنې مسوولیت پر غاړه اخیستی دی.
Author
