د پلازمینې کابل ځانمرګي برید کې اووه ملکي کسان ټپیان شوي

برید کې د بهرنیو ځواکونو یوه ګاډي ته زیان اوښتی دی

د کابل ښار په ننني ځانمرګي برید کې اووه ملکي وګړي ټپیان شوي دي.

د امریکا په مشرۍ د پریکنده پوځي ملاتړ اتحاد کابل کې تایید کړې، چې د ګاډو پر یوه کاروان یې برید شوی دی، خو ویاند ډګروال براین ویلي، چې دغه برید کې د کومو تلفاتو په اړه رپوټ نه دی ورکړل شوی.

کابل کې د بي بي سي خبریاله شایمه خلیل وايي برید کې یوه پوځي ګاډي ته زیان اوښتی.

بل لور ته د کابل امنیې قومانان عبد الرحمن رحیمي بیا د پيښې په ځای کې خبریالانو ته وویل، د بهرنیو ځواکونو د پریکنده ملاتړ اړوند دوه موټر د کابل ښار له جوی شیر سیمه تېریدل چې د یوه ځانمرګي برید کوونکي له خوا پرې موټر بم چاودنه وشوه.

هغه زیاته کړه په دغه پېښه کې یواځې درې ملکي وګړي ټپیان شوي او بهرنیو ځواکونو ته د سر زیان نه دی اوښتی.

د پېښې په شاوخوا سیمو کې ځینې کورونو ته هم زیان اوښتی دی.

پیښه د کابل ښار مرکزي سیمې ده افغانان ته څېرمه شاوخوا نهه بجې د ګڼې ګوڼې پرمهال وشوه.

ځانمرګي بریدګر له چاودیدونکو توک موټر ته چاودنه ورکړه

وسله والو طالبانو ددغه برید مسوولیت په غاړه اخیستی او بهرنیو ځواکونو ته یې د سر د درانه زیان اړولو ادعا کړې ده.

له دې مخکې د افغانستان کورنیو چارو وزارت د ویندوی مرستیال نجیب دانش بي بي سي ته وویل، چې دا یو ځانمرګي برید و، چې وايي سهار نژدې نهه بجې شوی دی.

د نوموړي په خبره د برید هدف د بهرنیو ځواکونو د ګاډو یو کاروان و.

ښاغلي دانش وویل، چې برید دویمې ناحیې جوی شیر سیمه کې شوی دی.

چاودنه ګهیځ داسې مهال شوې، چې د ښار په دغه ګڼ مېشته سیمه کې خورا ګڼه ګوڼه وي.

وسله والو طالبانو د برید مسوولیت منلی او وايي د بهرنیو ځواکونو دوه ګاډي په دغه برید کې ویجاړ شوي دي.