کرزی با کاندیدان ریاست جمهوری دیدار کرد

حامدکرزی رئیس جمهوری اسلامی افغانستان، بعد از ظهر امروز با کاندیدان ریاست جمهوری دکتور عبدالله عبدالله و دکتور اشرف غنی احمدزی دیدار کرد.

به گزارش خبرگزاری خاورمیانه، در این دیدار که معاونین ریاست جمهوری نیز حضور داشتند، کاندیدان ریاست جمهوری، رئیس جمهور را در جریان پیشرفت های حاصله در گفتگوهای شان برای ایجاد حکومت وحدت ملی، قراردادند.

کاندیدان ریاست جمهوری اظهار آرزومندی نمودند که توافقات حاصله را به زودی در حضور رئیس جمهور و شخصیت های معزز افغانستان به امضاء برسانند.

رئیس جمهور کرزی یک بار دیگر از کاندیدا ها خواست تا در زمینه رسیدن به توافقات شان، تلاش های شان را هرچه زود تر به نتیجه برسانند.

رئیس جمهور تاکید کرد که وی با تمام توان خود برای تسریع پروسه رسیدن به توافق شان، کما فی السابق با آنها همکاری خواهد کرد.