تلاش تاجیکستان برای رهایی دو شهروندش در افغانستان

دولت تاجیکستان برای رهایی دو شهروندش که به دست یک گروه قاچاقچی افغانستان ربوده شده، به تلاش های خود افزوده و با این گروه وارد مذاکره شده است.

به گزارش خبرگزاری خاورمیانه، «محمدجان الغخاجه یف»، سخنگوی سازمان نیروهای مرزی امنیت ملی تاجیکستان می گوید که در یک طرف این مذاکره مقامات مسئول تاجیکستان و افغانستان و در طرف دیگر گروه قاچاقچی قرار دارد.

به گفته وی، دولت تاجیکستان تنها برای آزادی دو شهروند خود وارد مذاکره شده و امید می رود که این مذاکرات مثمرثمر واقع شود.

الغخاجه یف افزود که دولت تاجیکستان تمام تلاش خود را برای رهایی این دو شهروندش انجام می دهد.

در عین حال، یک گروه ویژه نظامی برای رهایی و ردیابی شهروندان تاجیکستان ولایت بدخشان ایجاد شده است.

مقام های امنیتی بدخشان می گویند که این گروه ویژه تلاش دارد تا بدون آسیب رسیدن به شهروندان تاجیک؛ آنان را آزاد کند.

روز شنبه همین هفته یک گروه قاچاقچی افغانستان یک فرد ساکن قریه «دشتیجوم» ولسوالی «شمس الدین شاهین» تاجیکستان را مجروح و دو نفر دیگر را ربودند.

طی ۲۰ روز گذشته این دومین حمله افراد مسلح افغانستان به تاجیکستان است. صبح پنجم مارچ ماه میلادی جاری در مرز «پنج» میان مرزبانان تاجیک و یک گروه مسلح ۹ نفره افغان درگیری رخ داد که در نتیجه یک افسر تاجیک کشته شد.