تاجیکستان روی گسترش روابط همکاریها با افغانستان تاکید کرد

شکور جان ظهوروف، رئیس مجلس عالی جمهوری تاجیکستان در دیدار با «صلاح الدین ربانی» وزیر امور خارجه جمهوری اسلامی افغانستان، روی گسترش روابط همکاریها با افغانستان تاکید کرد.

به گزارش خبرگزاری خاورمیانه، صلاح الدین ربانی وزیر امور خارجه جمهوری اسلامی افغانستان طی یک سفر رسمی به تاجیکستان رفته است.

در این دیدار رئیس مجلس عالی تاجیکستان پیرامون روابط دیرینه دوستانه و پیوندهای ژرف دینی، فرهنگی و زبانی میان دو کشور صحبت نموده است.

وی بر عزم راسخ رهبری تاجیکستان برای گسترش همکاریها در ساحات اقتصادی، تجارتی، ترانزیتی، انتقال انرژی و روابط بین الپارلمانی با افغانستان تأکید ورزیده است.

او همچنان حضور گروه های تروریستی و تولید و قاچاق مواد مخدر در منطقه را از تهدیدات مشترک امنیتی دو کشور دانسته و همکاری های هرچه بیشتر منطقوی و جهانی را برای مبارزه مؤثر در برابر این چالش ها، به عنوان نگرانی های مشترک همه کشورها، ضروری خواند.

همچنین وزیر امور خارجه افغانستان سفر رسمی اش به دوشنبه را نشانه بارزی از اهمیت جایگاه تاجیکستان در سیاست خارجی افغانستان و توجه ویژه دولت های هردو کشور به گسترش هرچه بیشتر مناسبات در سطوح دوجانبه و چندجانبه عنوان کرده و از فرصت های مساعد منطقوی برای تعمیق همکاری ها میان افغانستان و تاجیکستان در ساحات مختلف یادآوری نمود.

در ادامه، دو طرف پیرامون پیشرفت های اخیر در تلاش های صلح دولت افغانستان و مسائل مهم منطقوی و بین المللی مورد علاقه مشترک بحث و تبادل نظر نمودند.