په کندز کې د طالبانو له زندان څخه ۱۷ تنه بندیان ازاد شول
د افغانستان د ملې امنیت ریاست وایي د کندز ولایت په خان اباد ولسوالۍ کې په یو لړ ځانګړیو عملیاتو کې د طالبانو له یوه زندان څخه ۱۷ کسان خوشي شوي دي.
د خاورمیانه خبرې اژانس د راپور له مخې،چې د ملې امنیت ریاست د مطبوعاتي دفتر د نن ورځې (سلواغې ۲۱) د خبرپاڼې څخه یې نقل کړي دي،دا عملیات وړمه شپه د خان اباد ولسوالۍ په نواباد سیمه کې ترسره شوي دي.
په خبرپاڼه کې راغلي دي چې د ملې امنیت ځانګړیو ځواکونو په دې عملیاتو کې د طالبانو له یوه زندان څخه ۱۵ نظامیان او دوه ملکیان ازاد کړي دي.
د ملې امنیت ریاست وایي چې دا زندان د وسله والو طالبانو د یوه قومندان قاري ولي اړوند وو او دغه کسان پکې د څو میاشتو راهیسې بندیان وو.
د یادونې وړ ده چې په دې عملیاتو کې د طالبانو درې قرارګاوې او زندان په بشپړ ډول تخریب او له مینځه وړل شوی دی.
دوه اوونۍ وړاندې د ملې اردو کومانډو ځواکونو هم په بادغیس ولایت کې د طالبانو له یوه زندان څخه ۶۲ تنه نظامیان ازاد کړي وو.