قیصاري لا هم هماغسې مقاومت کوي
وروسته له دې چې امنیتي ځواکونه د «نظام الدین قیصاري» د نیولو لپاره لاس په کار شول؛ د نوموړي د وسله والو کسانو د مقاومت سره مخ شوي او له تیرې شپې راهیسې تر اوسه په مزار شریف کې د قیصاري کور ته نږدې ډزې روانې دي.
د خاورمیانه خبرې اژانس د راپور له مخې، د قیصاري د نیولو عملیات تیره ورځ د محکمې په حکم د خلکو د شکایتونو د څیړلو په تعقیب پیل شوي دي.
د بلخ د پولیسو ویاند عادل شاه عادل خاورمیانه ته وویل: «نښته دمګړۍ(د سهار ۹:۰۰ بجې ،لیندۍ ۲۴) هم جریان لري او امنیتي ځواکونه هڅه کوي تر څو قیصاري ونیسي.»
نوموړي څرګنده کړه چې په دې وروستیو کې «نظام الدین قیصاري» په مزار شریف کې د وضعیت د خرابوالي،ګډوډۍ،باج اخیستنې او د عامه امنیت د ګډوډولو لامل ګرځیدلی وو نو له همدې کبله عدلي او قضایي ادارو د نوموړي او د هغه د اړونده کسانو د نیولو حکم صادر کړ.
عادل زیاته کړه؛ کله چې ملې دفاعي او امنیتي ځواکونو د عدلي او قضایي ادارو د حکم پر اساس لاس په کار شول او د نظام الدین قیصاري کور یې محاصره کړل او د نوموړې او د هغه د کسانو د تسلیمیدو غوښتنه یې وکړه د وسله وال مقاومت سره مخ شول چې نښته رامنځته شوه.
د بلخ د پولیسو ویاند ټینګار وکړ چې امنیتي ځواکونو پریکړه کړي ترڅو د قانون حکم عملي کړي،قیصاري او کسان یې ژر تر ژره ونیسي او د قانون منګولو ته یې وسپارې.
د مزارشریف اوسیدونکې وایي چې د ښار اوسنی وضعیت نظامي حالت ته لویدلی دی او پولیس د نظامي موټرو او درندو وسلو سره په ښار کې تګ راتګ کوي.
نظام الدین قیصاري له دې وړاندې په فاریاب ولایت کې د اسلامې جنبش ګوند اړوند د محلي ځواکونو د قومندان په توګه دنده اجرا کوله؛ مګر د تیر کال په سرطان میاشت کې د ملې امنیت د ځانګړیو ځواکونو له لورې د بشري قوانینو د نقض او غیر مسووله وسلوالو د درلودلو له امله نیول شوی مګر د جنرال دوستم په منځګړیتوب خوشی شوی وو.