په بغلان کې د طالبانو د زندان څخه ۳۴ تنه ازاد شول
د پولیسو ځانګړو ځواکونو په بغلان ولایت کې په یو لړ هدفي عملیاتو کې د وسله والو طالبانو یو زندان له مینځه وړی او ۳۴ تنه زندانیان یې ترې ازاد کړي دي.
د خاور میانه خبرې اژانس د راپور له مخې،دغه عملیات د تیرې شپې په نیمایي برخه کې د بغلان ولایت په مربوطاتو کې ترسره شوي دي.
د کورنیو چارو د وزارت ویاند نصرت رحیمي وایي چې له دې زندان څخه د امنیتي ځواکونو او عامو خلکو په ګډون ۳۴ تنه ازاد شوي او زندان هم له مینځه وړل شوی دی.
د نوموړي پر وینا،د زندانیانو په مینځ کې ۷ د ملې اردو سرتیري،۷ ملې پولیس،درې د ملې امنیت سرتیري او ۱۷ تنه ملکي وګړي شامل وو.
رحیمي په دې اړه زیات جزئیات نه دي وړاندې کړي.
د غبرګولي په ۸ نیټه هم د غزني ولایت په ګیرو ولسوالۍ کې د ۵ سرتیرو په ګډون ۹ تنه د وسله والو طالبانو له یوه زندان څخه ازاد شوي وو.