په هلمند کې د یوه خبریال ټپي کېدل
یو سیمه ایز خبریال په خپل موټر کې د ځای پرځای شوي مقناطیسي ماین د چاودنې له امله ټپي شو.
د هلمند د والي ویاند عمر ځواک خاور میانه خبرې اژانس ته وویل چې دغه چاودنه نن ورځ (کب۲۱) سهار د ۸ بجو په شاوخوا کې د لشکرګاه په ښار کې رامنځته شوي ده.
نوموړي زیاته کړه چې چاودنه د هلمند ولایت د سیمه ایز خبریال نثار احمد احمدي پر موټر د مقناطیسې ماین له کبله ترسره شوي چې په پیښه کې نوموړی خبریال ټپي شوی دی.
ځواک څرګنده کړه چې دغه خبریال روغتون ته لیږدول شوی او په دې اړه د پولیسو له لوري څیړني رواني دي.
لا تر اوسه کوم یو شخص یاډلې ددې پیښې مسوولیت پر غاړه اخیستی نه دی.
په ورته وخت کې د افغانستان د ازادو رسنیو څخه د ملاتړ ادارې «نۍ» د هلمند ولایت د امنیتي ځواکونو څخه غوښتي دي تر څو ددې پیښې عاملین وپیژني او د قانون منګولو ته یې وسپاري.
Author
About Author
