جاغوري د سقوط په خطر کې

د غزني ولایت د جاغوري ولسوالۍ په ځینو سیمو باندې د وسله والو طالبانو د سختو بریدونو له وجې دغه ولسوالې د سقوط کېدو له خطر سره مخ شوي ده او د امنیتي ځواکونو مرستې هم رسیدلي نه دي.

د غزني د ولایتي شورا غړی ،خالقداد اکبري خاور میانه خبرې اژانس ته وویل چې وسله والو طالبانو د نن ورځې(لړم ۱۶) له سهار راهیسې بریدونه پیل کړي دي او د جاغوري ولسوالۍ ځينې برخې یې نیولي دي.

د نوموړي پر وینا،وسله والو طالبانو د سهار په درې بجې د ګیلان ولسوالۍ څخه پر جاغوري ولسوالۍ برید ترسره کړی دی او د « حوت قل » په سیمه کې یې دوه نظامي مرکزونه نیولي دي.

اکبري زیاته کړه چې د سهار د لمانځه پر مهال وسله والو طالبانو د سیمې خلک یرغمل کړل او ولسي ځواکونه یې پر وړاندې مقابلې ته را ووتل.

د غزني د ولایتي شورا دې غړي زیاته کړه چې د مقر ولسوالۍ سره په پوله پروت ( داود) کلی هم نن سهار د وسلوالو طالبانو لاس ته ورغلی دی.

هغه زیاتوي:«طالبان د مسجدونو له لاوډسپیکرو څخه چغې وهي چې خلکو تسلیم شئ تر څو ونه وژل شئ».

اکبري څرګنده کړه چې د نن ورځې د سهار له پیل څخه د جاغوري لپاره د کومکي ځواکونو د مرستې غوښتنه کوي؛ مګر له «دروغو»څخه علاوه یې د څه شي ځواب اوریدلی نه دی.

نوموړي د تلفاتو او زیانونو په اړه څرګنده کړه:«د زیانونو اندازه ډېره ده؛  مګر لا تر اوسه یې دقیق شمېر په لاس کې نشته.»

په داسې حال کې د جاغوري ولسوالۍ خلک د دولتي ځواکونو د مرستې غوښتنه کوي چې د جمهوري ریاست ویاند ،شاه حسین مرتضوي په خپله پیسبوک پاڼه لیکلي دي چې:«د دښمن د ځپلو په موخه الوتکې د جاغوري په فضا کې دي.»

مګر د مرتضوي دغه خبرې د جاغوري خلک او د ولایتي شورا غړي دروغ ګڼي.

وسله والو طالبانو لا تر اوسه په دې اړه خپل نظر څرګند کړی نه دی.

Author

About Author

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *