رازق:د اسلامې حزب ازاد شوي بندیان د طالبانو ترهګرې ډلې سره یوځای شوي دي
د کندهار د پولیسو قومندان جنرال عبدالرازیق وایي چې د حزب اسلامې ازاد شوي زندانیان په کندهار ولایت کې د طالبانو د ترهګرې ډلې سره یو ځای شوي دي.
د کندهار د پولیسو قومندان وایي چې د حزب اسلامې ډېرې ازاد شوي بندیان په دي ولایت کې د طالبانو د ترهګرې ډلې سره یوځای شوي دي او په کندهار کې د حکومت پر وړاندې د ناامنۍ د را منځته کولو سبب ګرځیدلي دي.
جنرال رازق د خبرو په دوام کې ویلې دي چې د کندهار په دامان ولسوالۍ کې ځان وژونکی برید د حزب اسلامي د ازاد شویو بندیانو څخه د ولي محمد په نوم یو کس پلان کړی وو چې په تازه ډول د بند څخه خلاص شوی وو.
په همدغه حال کې رازق دعوه کړې ده چې د طالبانو د ترهګرې ډلې یو قومندان د حزب اسلامي د بندیانو د نوم لاندې له بنده خلاص شوی دی.
دا په داسي حال کې ده چې اسلامي حزب د طالبانو تروریستي ډلې سره د زندانیانو یوځای کیدل ردوي او وایي چې دا دعوې د حکومت سره د حزب اسلامي د سولې په بهیر کې خاورې اچول دي.
په همدې اساس د ملې شورا غړي د حکومت څخه د حزب اسلامې د ازاد شویو بندیانو په فعالیتونو باندې د څار غوښتنه کړیده.
د مشرانو جرګې یو نماینده مخدوم عبدالله محمدي وویل چې د افغانستان حکومت باید په ازاد شویو بندیانو څار ولري.حکومت باید دا ډاډ ورکړې چې په څه کارونو کې مشغول دی او دا نظارت باید په ډېر دقیق ډول سرته ورسوي.
د راپورونو پر اساس د حزب اسلامې او د حکومت تر مینځ د موافقې له مخې د ګلبدین حکمتیار ۱۵۳ تنه غړي د هیواد له زندانونو خوشې شوي دي چې ۷۰ تنه یې ددې حزب پخواني کلیدي اشخاص دي.