داعش د سوریې په تدمر ښار کې ماته خوړلې
د سوریې پوځ د روسیې جنګي الوتکو په هوایي ملاتړ توانېدلی د تدمُر پر تاریخي ښار د اسلامي دولت (داعش) نومې ډلې اورپکو بریدونه په شا وتمبوي.
ددغه راپور له مخې؛ د داعش جنګیالي چې د څو ساعتونو لپاره ددغه ښار په مرکز کې وو، له سیمې شاته شوي دي. د روسیې دفاع وزارت په وینا، ددغه هېواد جنګي الوتکو په ۶۴ هوایي بریدونو کې ددغې ډلې ۳۰۰ اورپکې وژلي دي. همداراز راپور ورکړل شوی چې د سوریې پوځ خپل سرتېري په حلب ښار کې له جګړې ګرځولي او تدمر ته یې استولي دي.
د ۲۰۱۵ کال له مې راوروسته داعش د نهو میاشتو لپاره د تدمر په دغه تاریخي ښار کې و او د ۲۰۱۶ کال به مارچ کې ترې وویستل شول. ددغه ښار د بريا تاق چې ډېر تاریخي ارزښت یې درلود د داعش لخوا ړنګ شو.
د سوریې د بشري حقونو د څار ډله چې مرکز یې لندن کې دی راپور ورکړی چې د روسي الوتکو “درنې” بمبارۍ داعش اړ کړی چې له ښاره شاته شي. ددغه راپور له مخې، ددغه ښار په څنډو کې جګړه دوام لري.
پر تدمر برید د سوریې پر پوځ متقابل برید بلل کېږي چې په بشپړ ډول د اورپکو له منګولو د حلب کنټرول ترلاسه کولو لپاره ددغه ښار په ختیځ کې په سخته جګړه کې ښکېل دی.
Author
