په بغلان ولایت کې د دوه قومندانانو ترمنځ په نښته کې ۲۰ کسانو ته مرګ ژوبله اوښتې ده
د بغلان ولايت په ده صلاح ولسوالۍ کې د دوو غير قانوني وسله والو قوماندانانو تر منځ د نښتې په ترڅ کې د دوو کسانو په وژل کېدو سره په وروستي يوه کال کې د ملکيانو په ګډون ٢٠ کسان وژل شوي او خلک يې د بې وسلې کولو غوښتنه کوي.
پوليس وايي چې دغه دوه کسان پرون شپه د ده صلاح په سنګبُران سيمه کې د شېرين اقا او ايوب جمعه خان په نومونو د دوو سيمه ييزو قوماندانانو تر منځ د نښتې په ترڅ کې وژل شوي او يو بل تن ټپي شوى دى.
د بغلان امنيه قوماندان مل پاسوال امين الله امرخیل وويل چې پوليس د يادې پېښې د څېړنې په موخه سيمې ته تللي او د يادې سيمې مهم ځايونه يې نيولي او د جګړې دواړه لوري غرونو ته په شا شوي دي.
د بغلان د ولايتي شورا مشر صفدر محسني وويل چې د نښتې لامل د سنګبران پر سيمه باندې د حاکميت درلودل دي او قوماندان ايوب جمعه خان هوډ درلود چې دغه سيمه تر خپل واک لاندې راولي چې د قوماندان شيرين اقا له مقاومت سره مخ شو.
هغه زياته کړه چې په وروستي يوه کال کې د دواړو قوماندانانو تر منځ د نښتې په ترڅ کې له دواړو لورو ١٥ کسان او دغه راز د يوې ښځې او دوو ماشومانو په ګډون پنځه ملکيان وژل شوي دي.
دا په داسې حال کې ده چې تېر ژمى د قوماندان ايوب کسانو په ده صلاح کې د واده پر مراسمو بريد وکړ چې په پايله کې يې د سليم په نوم د يادو مراسمو ترسره کوونکى له خپلې مور او يوه بل کس سره يو ځاى ووژل شو او دغه راز په ځوابي ډزو کې د قوماندان ايوب دوه کسان هم ووژل شول.
د بغلان د ولايتي شورا مشر وويل چې دغه قوماندانان له خلکو عشر اخلي او د حاصلاتو د راټولولو پر مهال د خلکو ځمکې غصبوي او حاصلات يې د توپک په زور له هغوى اخلي.
د يادې سيمې يوه مخور وويل چې خلک د يادو دوو قوماندانانو له زور او زياتې تر پزې راغلي دي.
هغه له دولته وغوښتل چې دغه وسلوال کسان ژر تر ژره بې وسلې کړي او د وژنو عاملين ونيسي او قانوني چلند ورسره وکړي.
امنيتي چارواکو څو ځلې ويلي چې کله د هغوى پر وړاندې عمليات کوي نو هغوى غرونو ته تښتي او کله چې پوليس بېرته له سيمې ځي، بيا راګرځي.
خو د بغلان امنيه قوماندان وويل، اوس که په هر ډول وي، دغه قوماندانان به نيسي.
Author
